جنگ بندی کی خلاف ورزیوں پر پاکستان کابھارت سے شدید احتجاج، بھارتی ناظم الامور کی دفتر خارجہ طلبی

ڈائریکٹرجنرل (جنوبی ایشیاءوسارک) زاہد حفیظ چوہدری نے بھارتی ناظم الامور گوراو اہلووالیا کو آج دفتر خارجہ طلب کیا اور 8 فروری 2020 کو لائن آف کنٹرول (ایل او سی) کے چڑی کوٹ سیکٹر میں بھارتی قابض فوج کی جنگ بندی کی خلاف ورزی کرتے ہوئے بلا اشتعال فائرنگ ،اس کے نتیجے میں بے گناہ شہری کی شہادت اور بے گناہ خاتون شہری کے شدید زخمی ہونے کی شدید مذمت کی اور ان واقعات پر پاکستان کی طرف سے شدید احتجاج کیا۔

بھارتی فوج کی بلااشتعال اور بلاامتیاز فائرنگ کے نتیجے میں میر محمد نے جام شہادت نوش کیا جبکہ 32 سالہ عفت ناز زوجہ محمد ارشد شدید زخمی ہوگئیں۔ دونوں افراد کا تعلق گاوں ککوٹہ سے ہے۔

بھارتی فوج کی جانب سے بے گناہ شہریوں کو نشانہ بنانے کی مذمت کرتے ہوئے ڈائریکٹر جنرل (جنوبی ایشیاءوسارک) نے زوردیا کہ بے حسی پر مبنی یہ بھارتی اقدامات نہ صرف 2003 کے جنگ بندی معاہدے بلکہ عالمی انسانی حقوق اور عالمی اقدارکی کھلم کھلا خلاف ورزی ہے ۔ یہ واقعات خطے کے امن وسلامتی کے لئے خطرہ ہیں۔انہوں نے کہاکہ ایل او سی اور ورکنگ باونڈری پر کشیدگی میں اضافہ کرکے بھارت اپنے زیرقبضہ جموں وکشمیر میں انسانی حقوق کی بدتر ہوتی صورتحال سے توجہ ہٹا نہیں سکتا۔

ڈائریکٹرجنرل (جنوبی ایشیاءوسارک) نے بھارت پر زوردیا کہ جنگ بندی سمجھوتے کا احترام کرے، تازہ ترین اور اس سے قبل ہونے والی جنگ بندی کی دانستہ خلاف ورزیوں کے واقعات کی تحقیقات کرائے ،’ ایل اوسی ‘ اور ’ورکنگ باونڈری‘ پر امن برقرار رکھے۔ انہوں نے زوردیا کہ بھارت اقوام متحدہ کے فوجی مبصر گروپ برائے پاکستان اور بھارت کو اقوام متحدہ کی سلامتی کونسل کی قراردادوں کے مطابق تفویض کردہ کردار ادا کرنے کی اجازت دے۔
٭٭٭٭

70/2020