جنگ بندی کی خلاف ورزیوں پر پاکستان کابھارت سے شدید احتجاج، بھارتی ناظم الامور کی دفتر خارجہ طلبی

ڈائریکٹرجنرل (جنوبی ایشیاءوسارک) زاہد حفیظ چوہدری نے بھارتی ناظم الامور گوراو اہلووالیا کو آج دفتر خارجہ طلب کیا اور 17 جون 2020 کو لائن آف کنٹرول (ایل او سی) کے باگسر اور نکیال سیکٹرز میں بھارتی قابض فوج کی جنگ بندی کی خلاف ورزیوں، بلا اشتعال فائرنگ کے نتیجے میں 4 بے گناہ شہریوں کی شہادت اور ایک کے زخمی ہونے پر پاکستان کی طرف سے شدید احتجاج کیا۔

بھارتی فوج کی بلااشتعال اور بلاامتیاز فائرنگ کے نتیجے میں ’ایل۔او۔سی‘ کے نکیال سیکٹرمیں 27 سالہ رمیض ولد سلیم، 25 سالہ تہذیب ولد سلیم، 13 سالہ علی معروف ولد محمد معروف ساکنان گاوں رتہ جبراورباگسر سیکٹر میں 60 سال رشیدہ بی بی زوجہ محمد حسین سکنہ گاوں لیواناکھیتر شہید جبکہ 61 سالہ محمد حسین ولد فتح علی سکنہ گاوں لیوانا کھیتر شدید زخمی ہوگئے۔

بھارتی قابض فوج ’ایل۔ او۔ سی‘ اور ’ورکنگ ۔باونڈری‘ پر بھاری اور خودکارہتھیاروں اور گولہ باری سے مسلسل شہری آبادی کو نشانہ بنارہی ہے۔رواں سال بھارت نے جنگ بندی کی 1410 خلاف ورزیوں کا ارتکاب کیا جس کے نتیجے میں 12 بے گناہ شہری شہید اور 102 زخمی ہوگئے۔

بھارتی فوج کی جانب سے بے گناہ شہریوں کو نشانہ بنانے کی مذمت کرتے ہوئے ڈائریکٹر جنرل (جنوبی ایشیاءوسارک) نے زوردیا کہ بے حسی پر مبنی یہ بھارتی اقدامات نہ صرف 2003 کے جنگ بندی معاہدے بلکہ عالمی انسانی حقوق اور عالمی اقدارکی کھلم کھلا خلاف ورزی ہے ۔ ان واقعات سے خطے میں پہلے سے کشیدہ ماحول مزید خراب ہوگا۔ انہوں نے کہاکہ ’ایل۔ او۔ سی‘ اور ’ورکنگ ۔باونڈری‘ پر کشیدگی میں اضافہ کرکے بھارت اپنے زیرقبضہ جموں وکشمیر میں انسانی حقوق کی بدتر ہوتی صورتحال سے توجہ نہیں ہٹا سکتا۔بھارتی حکومت کو سمجھنا ہوگا کہ اس کی غیرذمہ دارانہ پالیسیاں اور یک طرفہ اقدامات خطے کے امن وسلامتی کے لئے خطرات میں اضافہ کا باعث ہیں۔ خطے کے امن وسلامتی کے مفاد میں بھارت ذمہ دارانہ رویہ کا مظاہرہ کرے۔

ڈائریکٹرجنرل (جنوبی ایشیاءوسارک) نے بھارت پر زوردیا کہ وہ 2003 کے جنگ بندی سمجھوتے کا احترام کرے، تازہ ترین اور اس سے قبل ہونے والی جنگ بندی کی دانستہ خلاف ورزیوں کے واقعات کی تحقیقات کرائے ،’ ایل اوسی ‘ اور ’ورکنگ باونڈری‘ پر امن برقرار رکھے۔ انہوں نے زوردیا کہ بھارت اقوام متحدہ کے فوجی مبصر گروپ برائے پاکستان اور بھارت کو اقوام متحدہ کی سلامتی کونسل کی قراردادوں کے مطابق تفویض کردہ کردار ادا کرنے کی اجازت دے۔
٭٭٭٭

256/2020