سینئربھارتی سفارتکار کی دفتر خارجہ طلبی، جنگ بندی کی خلاف ورزیوں پر پاکستان کا بھارت سے شدید احتجاج
اسلام آباد: مورخہ 2 فروری 2021
سینئر بھارتی سفارتکار کو آج دفتر خارجہ طلب کرکے قابض بھارتی فوج کی جانب سے 2 فروری 2021 کو لائن آف کنٹرول (ایل۔او۔سی) پر جنگ بندی کی خلاف ورزیوں اور اس کے نتیجے میں تین خواتین سمیت چار بے گناہ شہریوں کے زخمی ہونے پر شدیداحتجاج کیا گیا۔
قابض بھارتی فوج کی 2 فروری 2021 کو بلاجوازاور بلاامتیاز فائرنگ کے نتیجے میں ’ایل۔او۔سی‘ کےتتہ پانی اور جندروٹ سیکٹرز میں تیس سالہ زوبینہ بخاری زوجہ فیضان شاہ سکنہ گاوں تاہی موہڑہ، سترہ سالہ ردا طاہر دختر بشارت شاہ سکنہ گاوں تاہی موہڑہ، سولہ سالہ امین علی ولد بشارت شاہ سکنہ گاوں تاہی موہڑہ، بیالیس سالہ سلیمہ بیگم زوجہ محمد یعقوب سکنہ گاوں بٹالی شدید زخمی ہوگئیں۔
قابض بھارتی فوج ’ایل۔او۔سی‘ اور ’ورکنگ۔باونڈری‘ پر عام شہری آبادی کو آرٹلری اور بھاری وخودکار ہتھیاروں سے مسلسل نشانہ بنارہی ہے۔ رواں سال2021 میں اب تک بھارتی قابض افواج نے 175 مرتبہ جنگ بندی کی خلاف ورزی کی جس کے نتیجے میں 8 بے گناہ شہری شدید زخمی ہوئے۔
قابض بھارتی فوج کی جانب سے بے گناہ شہری آبادی کو دانستہ نشانہ بنانے کی شدید مذمت کرتے ہوئے بھارت پر زوردیا گیا کہ بے حسی پر مبنی یہ کارروائیاں 2003 کے جنگ بندی معاہدے، انسانی عظمت ووقار، بین الاقوامی انسانی حقوق و قوانین اور پیشہ وارنہ فوجی طرز عمل کے منافی اور اس کی صریحا خلاف ورزی ہے۔ بین الاقوامی قانون کی خلاف ورزیاں ایل او سی پر کشیدگی بڑھانے کی مسلسل بھارتی کوششوں کا مظہر اور خطے کے امن وسلامتی کے لئے خطرہ ہیں۔ زور دیاگیا کہ ’ایل۔او۔سی‘ اور ’ورکنگ باونڈری‘ پر کشیدگی میں اضافہ کے ذریعے بھارت غیرقانونی طور پر اپنے زیر قبضہ جموں وکشمیر میں انسانی حقوق کی سنگین ترین خلاف ورزیوں سے توجہ نہیں ہٹا سکتا۔
بھارت پر زوردیا گیا کہ 2003 کے جنگ بندی سمجھوتے کا احترام کرے، تازہ ترین اور اس سے قبل ہونے والی جنگ بندی کی دانستہ خلاف ورزیوں کے واقعات کی تحقیقات کرائے ،’ ایل اوسی ‘ اور ’ورکنگ باونڈری‘ پر امن قائم کرے۔ بھارت پر یہ بھی زوردیاگیا کہ اقوام متحدہ کے فوجی مبصر گروپ برائے پاکستان اور بھارت کو اقوام متحدہ کی سلامتی کونسل کی قراردادوں کے مطابق تفویض کردہ اپنا کردار ادا کرنے دے۔
48/2021
Last modified: فروری 2, 2021
