وزیر خارجہ مخدوم شاہ محمود قریشی سے امریکی نائب سیکرٹری دفاع جان روڈ کی واشنگٹن میں ملاقات
وزیرخارجہ مخدوم شاہ محمود قریشی سے امریکی نائب وزیردفاع جان روڈ نے جمعہ کے روز ملاقات کی جس میں پاک امریکہ،دفاعی تعلقات اور خطے میں امن و امان کی مجموعی صورتحال پر تبادلہ خیال کیا گیا۔
امریکی نائب وزیر دفاع نے وزیر خارجہ شاہ محمود قریشی سے پاک امریکہ دفاعی تعاون کے مختلف پہلوں اور وقوع پزیر علاقائی صورتحال پر بات چیت کی۔ نائب وزیر دفاع نے وزیر خارجہ کو دونوں ممالک کے درمیان دفاع سے متعلقہ جاری تعاون پر آگاہ کیا۔ وزیر خارجہ نے امریکی نائب وزیر دفاع کو پاکستان کی جانب سے جنوبی ایشیائی خطے میں قیام عمل کیلئے کی جانے والی مختلف کاوشوں سے آگاہ کیا۔
وزیرخارجہ نے کہاکہ دفاع اور سلامتی کے شعبے میں دونوں ممالک کے درمیان ہمارا تعاون دوطرفہ تعلقات کے ایک اہم پہلو کو اجاگر کرتا ہے۔ انہوں نے کہاکہ پاکستان کے لئے انٹرنیشنل ملٹری ایجوکیشن اینڈ ٹریننگ (آئی ایم ای ٹی) پروگرام کی بحالی کا امریکی فیصلہ علامتی لحاظ سے بہت اہمیت کا حامل ہے اور دوطرفہ فوجی تعاون کی مزید بحالی کے لئے اولین خوش آئند اقدام ہے۔
وزیر خارجہ نے امریکی نائب وزیردفاع کو علاقائی ممالک کے اپنے حالیہ دوروں سے آگاہ کرتے ہوئے کشیدگی میں کمی اور بات چیت کی ضرورت پر زوردیا۔ انہوں نے کہاکہ مشرق وسطیٰ میں کشیدگی پورے خطے کیلئے خطرات کا موجب بن سکتی ہے، اسی لئے پاکستان نے کشیدگی کم کرنے اور امن کاوشیں بروئے کار لانے کا فیصلہ کیا۔ وزیر خارجہ نے ایران امریکہ کشیدگی میں کمی لانے اور خطے میں قیام امن کیلئے پاکستان کی جانب سے متحرک اور مثبت کردار ادا کرنے کے عزم کا اعادہ کیا۔ انہوں نے کہاکہ پاکستان اپنے ہمسائے میں کسی بھی قسم کے عدم استحکام کے امکانات پر شدید تشویش میں مبتلا ہے اور امریکہ اور ایران کے درمیان کشیدگی کے پرامن حل کی تلاش میں اپنا کردار ادا کرنے کو تیار ہے۔
31/2020
Last modified: جنوری 18, 2020
