پریس ریلیز
اسلام آباد: مورخہ 15 فروری 2021
نئی دہلی میں تعینات سفارتکاروں کو غیرقانونی طورپر بھارت کے زیرقبضہ جموں وکشمیرکے ”دورہ“ کی بھارتی منصوبہ بندی عالمی برادری کو گمراہ کرنے کی کوششوں کا حصہ ہے:ترجمان دفتر خارجہ
(پریس ریلیز نمبر62/2021 )
ترجمان دفتر خارجہ نے میڈیا کے سوالات کا جواب دیتے ہوئے کہا ہے کہ ہم نے نئی دہلی میں تعینات سفیروں کے غیرقانونی طورپر بھارت کے زیرقبضہ جموں وکشمیرکے”دورہ“ کی بھارتی منصوبہ بندی کے بارے میں رپورٹس کو دیکھا ہے جوعالمی برادری کو گمراہ کرنے کی بھارتی کوششوں کا حصہ ہے۔
منصوبہ بندی پر مبنی ایسے دورے محض دھوکہ ہیں جن کا مقصد غیرقانونی طورپر بھارت کے زیرقبضہ جموں وکشمیر میں انسانی حقوق کی سنگین ترین پامالیوں سے عالمی برادری کی توجہ ہٹانا ہے اور ’حالات ٹھیک“ ہونے کا جعلی تاثر پیدا کرنا ہے۔
یہ دورہ بے معنی ہوگا اگر تمام علاقوں تک رسائی نہ ہو اور آزادانہ و جبر سے پاک ماحول میں کشمیری عوام اور سول سوسائیٹی سے ملاقات کا امکان نہ ہو۔ جھوٹے اور بے بنیاد الزامات پر پابند سلاسل سینئر حریت قیادت سے ملاقات اس ضمن میں اتنی ہی اہم ہے جو زمینی حقائق کے درست اندازے کے قابل بناسکے گی۔
غیرقانونی طورپر بھارت کے زیرقبضہ جموں وکشمیر میں نام نہاد صورتحال ٹھیک ہونے کے بھارتی دعوے کی کوئی بنیاداورحقیقت نہیں۔ دنیا واضح دیکھ سکتی ہے کہ اٹھارہ ماہ سے غیرانسانی فوجی محاصرہ جاری ہے، جعلی ’مقابلوں‘ ، ’چھاپوں اور تلاشی‘ کی کارروائیوں کا ڈھونگ رچایا جاتا ہے، غیرقانونی گرفتاریوں، جبری لاپتہ کرنے، زیرحراست افراد پر تشدد و ہراساں کرنے کاسلسلہ جاری ہے جبکہ کشمیریوں کو ان کے اظہار رائے سمیت بنیادی حقوق سے مسلسل محروم رکھا جارہا ہے۔
بھارت انسانی حقوق کے لئے ہائی کمشنر کے دفتر (او۔ایچ۔سی۔ایچ۔آر)، اقوام متحدہ کے مبصرین، ’او۔آئی۔سی‘ کے انسانی حقوق کے آزاد اور مستقل کمشن (آئی۔پی۔ایچ۔آر۔سی)، عالمی انسانی حقوق اور سول سوسائیٹی کی تنظیموں کو غیرقانونی طورپر بھارت کے زیرقبضہ جموں وکشمیر جانے کی اجازت دے تاکہ وہ صورتحال کا ازخود جائزہ لے سکیں۔
عالمی برادری بشمول عالمی رہنماوں، ارکان پارلیمان، عالمی انسانی حقوق کی تنظیموں اور میڈیا نے متفقہ طورپر غیرقانونی طورپر بھارت کے زیرقبضہ جموں وکشمیر میں جاری مظالم کی مذمت کی ہے، بھارت پر زور دیا جائے کہ تنازعہ جموں وکشمیر کو اقوام متحدہ کی سلامتی کونسل کی متعلقہ قراردادوں اور کشمیری عوام کی خواہشات کے مطابق حل کرنے کے لئے حقیقی اقدامات کرے۔
٭٭٭٭٭٭
62/2021
Last modified: فروری 22, 2021
