گیارہ جنوری 2020کوجنگ بندی معاہدہ کی خلاف ورزی ،شہری کی شہادت پر بھارتی ناظم الامور کی دفتر خارجہ طلبی

اسلام آباد: مورخہ 13 جنوری 2020

ڈائریکٹرجنرل (جنوبی ایشیاءوسارک) زاہد حفیظ چوہدری نے لائن آف کنٹرول (ایل او سی) پر کوٹ کوٹیڑہ اور کریلا سیکٹرز میں بھارتی قابض فوج کی 11 جنوری 2020 کو جنگ بندی کی خلاف ورزی کرتے ہوئے بلا اشتعال فائرنگ اور اس کے نتیجے میں بے گناہ شہری کی شہادت پر بھارتی ناظم الامور گوراو اہلووالیا کو آج دفتر خارجہ طلب کیا اور ان واقعات کی شدید مذمت کرتے ہوئے پاکستان کی طرف سے احتجاج کیاگیا۔

بھارتی فوج کی بلااشتعال اور بلاامتیاز فائرنگ کے نتیجے میں 24 سالہ نوجوان محمد اشتیاق شہید ہوگیا جو گاوں چوکی، تحصیل وضلع ضلع کھوئی رٹہ کا رہائشی تھا۔

بھارتی فوج کی جانب سے بے گناہ شہریوں کو نشانہ بنانے کی مذمت کرتے ہوئے ڈائریکٹر جنرل (جنوبی ایشیاءوسارک) نے زوردیا کہ ایسے حماقت پر مبنی بھارتی اقدامات نہ صرف 2003 کے جنگ بندی معاہدے بلکہ عالمی انسانی حقوق اور عالمی اقدارکی کھلم کھلا خلاف ورزی ہے ۔ یہ واقعات خطے کے امن وسلامتی کے لئے خطرہ ہیں۔انہوں نے کہاکہ ایل او سی اور ورکنگ باونڈری پر کشیدگی میں اضافہ کرکے بھارت اپنے زیرقبضہ جموں وکشمیر میں انسانی حقوق کی بدتر ہوتی صورتحال سے توجہ ہٹا نہیں سکتا۔

ڈائریکٹرجنرل (جنوبی ایشیاءوسارک) نے بھارت پر زوردیا کہ وہ جنگ بندی سمجھوتے کا احترام کرے، تازہ ترین اور اس سے قبل ہونے والی جنگ بندی کی دانستہ خلاف ورزیوں کے واقعات کی تحقیقات کرائے ،’ ایل اوسی ‘ اور ’ورکنگ باونڈری‘ پر امن برقرار رکھے۔ انہوں نے زوردیا کہ بھارت اقوام متحدہ کے فوجی مبصر گروپ برائے پاکستان اور بھارت کو اقوام متحدہ کی سلامتی کونسل کی قراردادوں کے مطابق تفویض کردہ کردار ادا کرنے کی اجازت دے۔

21/2020